102-SÛREYA TEKASÛR

102-SÛREYA TEKASÛR

BİNAMEYÊ HOMAY O KE HESKERDOX Û BEXŞKAR O

1-Şima kewtî musebeqayê numayîşî zengînîye û ha kay kenî.!
2-(No yew nûmayîşî ku) Hetta verbi gore şima kay kenî.!
3- La ney! Şima nizdî ra pê hesîyenî.!
4-Zaf dur ney;şima ku lez pê bihesî.!
5-Belê eke şima bieşkayîn qur-qur biewnîyayîn
6-Şima ke vînî şima çawa ver bi cehneme ha lêr benî.
7-Bi çimanê xo ku şima o(cehneme) eşkera bivînî.!
8-A roj şima heme nîmet ra yenî persiş!
(8-A roj her nîmet şima ra persîyenû)v

Sureya Tekasûr, bigoreyê aliman îttifaqen Mekke de ameya war.Nameyê xo “tekasur” ra girewt o. Tekasûr, ferheng de mastarê ”k-s-r “ra yeno no mana; “zêdbîyayîş, zêdekerdiş” o. Zêdbîyayîşê Malî, zengînîye (îksar), zêde kerdiş, teksîr kerdiş (teksîr), pêsernayîş (tekasûr), waştina zêde kerdiş (îstîksar),; heyna zaf, tewr zaf (ekser), zêdanîye, xalibîyet, serkewtin (ekserîye), bolîye, zafîye (kesret), xeberzaf, geweze (mîksar)…Yanî, îta de “Tekasûr” zafbîyayîşê mal, meqam, caygeh, zengînîye, namdarî û şohret sero paye girewtişo. Xo pîl hesabnayîş û veynayîş o. Bixo çekuya “zengînîye”, çekuya “seng” ra yena. Şima zî zanî ke ziwanê Îranîyan de û tey fekê zazayan de “seng” kerraya, “sengîn” zî o ke zaf zexmo, wayîrê kerrayanê xemlinan û ercyayan o. Tekasûr zî bi Erebkî babê Tefaûl ra yen o. Yanî, hemberî yewbînan de têver de musebeqe kerdiş o. No semed ra açarnayîş (tercume) de ma vato, “musebeqeya numayîşî zengînîye”.

Heto bîn ra eyro Tekasûr, teqabulê “Kapîtalîzm î” ben o. Çunkî kapîtalîzm de zî arêdayîşê mal û serwetî, numayîşê mal, meqam û namdarî estî. Pêsernayîş ha pêsernayîş…Na musebeqa, no ceng, no gelo-melo mîyanê kapîtalîstan de çiray nêqedîyen o. Hetta verbi gore(mezel) berdewam ken o. Mîyanê nê laserî numayîşî de awe de şinî. Xo vînd kenî, bêhed û bêsînur zewq û sefa dima perenî.

Homa vano; no moj ra şima ke çimeyan heme çîyê xo zuwa bikî,dengeyê pisîkolojîyê xo, dengeyê cemaeto xo, dengeyê ekolojîye xo, dengeyê debara (ekonomî) xo, do bixerepnîn û uca ra apey şima do bidî çokan xo rê.

Xora belîyo ke dengeyê heme çî xerepya dinya û axret bena cehîm(cehnem). O wext apey ameyîş zî çîn yo. Gerek însanî hîşî xo arêbidî xo ser. La hîşî xo arênêdîy do bivînî cuyayîş (heyat-zindewarî) çawa serûbin ben o. No semed ra Homa vano; mal û serwetî sero ceng mekîn mi para her kesî daya rezzaq ez o.Dinya û axretî xo, xo rê jehr û zıqqım mekîn. Roja xelat û celatî de ez heme kerdeyanê şima û heme nîmetanê xo ra şima kaş keno hesab. A roj hesab zaf çetin o.

Ya rebb! Ti ma rê aye roj a çetin de ardimkarî bikerî.

Ellahu Alem